24. அஞ்செழுத்திலே பிறந்து, அஞ்செழுத்திலே வளாந்து, அஞ்செழுத்தை ஓதுகின்ற பஞ்ச பூத பாவிகாள். அஞ்செழுத்தில் ஒரெழுத்து அறிந்து கூற வல்லீரேல்! அஞ்சல், அஞ்சல் என்று நாதன் அம்பலத்தில் ஆடுமே.

23. தங்கம் ஒன்று, ரூபம் வேறு, தன்மையானவாறு போல். செங்கண், மாலும் ஈசனும் , சிறந்து இருந்தது எம்முள்ளே ! பிங்களங்கள் பேசுவார், பிணங்குகின்ற மாந்தரே! எங்குமாகி நின்ற நாமம், நாமம், இந்த நாமமே !

22. சங்கு இரண்டு, தாரை ஒன்று, சன்ன பின்னல் ஆகையால், மங்கி மாளும் தேய் உலகில் மனிடங்கள் எத்தனை?. சங்கிரண்டையும், தவிர்ந்து, தாரை ஊத வல்லீரேல் ! கொங்கை, மங்கை, பங்கரோடு கூடி வாழலாகுமே!.

21. சாமம், நாலு வேதமும், சகல சாத்திரங்களும், சேமமாக ஓதினும், சிவனை நீர் அறிகிலீர். காமநோயை விட்டு நீர், கருத்துளே உணர்ந்த பின், ஊனமற்ற காயமாய் இருப்பன் , எங்கள் ஈசனே!.

அண்டவாசல் ஆயிரம், பிரசண்ட வாசல் ஆயிரம். ஆறிரண்டு நூறு கோடி , ஆன வாசல் ஆயிரம், இந்த வாசல் ஏழை வாசல், ஏக போகமான வாசல். எம்பிரான் இருக்கும் வாசல், யாவர் கான வல்லீரோ?.

அஞ்சு மூணு எட்டதாம், அனாதியான மந்திரம். நெஞ்சிலே நினைந்து கொண்டு, நீர் உரக்கச் செப்பிரல், பஞ்சமான பாதகங்கள், நூறு கோடி செய்யினும் ! பஞ்சு போல் பறக்குமென்று, நான் மறைகள் பண்ணுமே!

வித்தில்லாத சம்பிரதாயம் , மேலும் இல்லை , கீழம் இல்லை. தச்சில்லாத மாளிகை, சமைந்தவாறு எங்கனே? பெற்ற தாயை, விற்று அடிமை, கொள்ளுகின்ற பேதைகாள் ! சித்தில்லாத போது சீவன் , இல்லை இல்லை இல்லையே!.

நாலுவேதம் ஓதுவீர், ஞானபாதம் அறிகிலீர் பாலுள்நெய் கலந்தவாறு பாவிகாள், அறிகிலீர்! ஆலம்உண்ட கண்டனார் அகத்துளே இருக்கவே காலன்என்று சொல்லுவீர், கனவிலும் அஃதில்லையே.

தூரம், தூரம், தூரம் என்று சொல்லுவார்கள், சோம்பர்கள். பாரும் விண்ணும் எங்குமாய்ப் பரந்த அப் பராபரம். ஊரு நாடு காடு தேடி உழன்று தேடும், ஊமைகாள்! நேரதாக உம்முளே அறிந்து உணர்ந்து கொள்ளுமே !

சாத்திரங்கள், ஓதுகின்ற சட்டநாத பட்டரே? வேர்த்து இறைப்பு வந்த போது, வேதம் வந்து உதவுமோ? மாத்திரை போதும் உள்ளே அறிந்து நோக்க வல்லிரேல், சாத்திரப்பை நோய்களேது? சக்தி, முத்தி , சித்தியே ?

நானதேது, நீயதேது, நடுவில் நின்றது ஏதடா? கோனதேது, குருவதேது, கூறிடும் குலாமரே? ஆனதேது அழிவது ஏது , அப்புறத்தில் அப்பரம். ஈனதேது , ராம, ராம ,ராமம் என்ற நாமமே!

கதாவு பஞ்ச பாதகங்களைத் துரந்த மந்திரம், இதாம், இதாம் அதல்லவென்று, வைத்துழலும் ஏழைகாள். சதா விடாமல் ஓதுவார், தமக்கு நல்ல மந்திரம். இதாம், இதாம் ராம ராம ராமம் என்னும் நாமமே?